Joriy yilning 4-5-aprel kunlari Samarqand davlat tibbiyot universitetida O‘zbekiston Respublikasida xizmat ko‘rsatgan sog‘liqni saqlash xodimi, taniqli olim Abdullaev Nurmamat Abdullaevich xotirasiga bag‘ishlangan "Sog‘liqni saqlashda innovatsion texnologiyalar: ichki tibbiyot uchun yangi imkoniyatlar" mavzusidagi IV Xalqaro ilmiy-amaliy konferensiya bo‘lib o‘tdi.
Mazkur anjuman sog‘liqni saqlash sohasi mutaxassislari, olimlar, tibbiyot muassasalari vakillari va xalqaro ekspertlarni birlashtirib, innovatsion tibbiyot texnologiyalarining kasalliklarni davolash va diagnostika jarayonlariga ta’sirini muhokama qilishga qaratilgan bo‘lib, anjuman ochilishida so‘zga chiqqan Samarqand viloyati Sog‘liqni saqlash boshqarmasi boshlig‘i Suxrob Zayniyev tashkil etilayotgan mazkur nufuzli anjumanning ilmiy va amaliy tibbiyotdagi ahamiyatini alohida ta’kidladi.
Anjuman ishida Respublikamiz bilan bir qatorda Rossiya Federatsiyasi, Xitoy, Qozog‘iston, Tojikiston, Qirg‘iziston va boshqa bir qator davlatlarda yetakchi mutaxassislar va tadqiqotchilar ishtirok etdi.
Anjuman doirasida “Revmatik kasalliklarda anemiya sindromi”, “Qandli diabet bilan kasallangan bemorlarda surunkali buyrak kasalligi - global tibbiy muammo”, “Semizlikni davolashning zamonaviy usullari. yO-yO effektidan qanday qochish kerak”, “Qandli diabet 2-tur va surunkali buyrak kasalligi bilan og‘rigan bemorlarda kardio-nefroprotektiv davolashning zamonaviy imkoniyatlari” va boshqa dolzarb muammolargaq qaratilgan ma’ruzalar, shuningdek, UTT nazorati ostida dori vositalarini bo‘g‘imlar ichiga yuborish bo‘yicha umumiy tamoyillar”, “Diagnostik imkoniyatlar va klinik ko‘rsatmalar”, “Reanimatsiyadan keyingi parvarish va kengaytirilgan davolash”, “Bronxoobstruktiv sindromning funksional tashxisi” va boshqa ko‘plab mavzularda mahorat darslari tashkil etildi.
Shuningdek, Anjuman doirasida Samarqand davlat tibiyot universiteti 1-son ichki kasalliklar kafedrasiga O‘zbekiston Respublikasida xizmat ko‘rsatgan sog‘liqni saqlash xodimi, olim Abdullaev Nurmamat Abdullaevich nomi berildi.
O‘zbekiston Respublikasida xizmat ko‘rsatgan sog‘liqni saqlash xodimi, olim Abdullaev Nurmamat Abdullaevich xotirasiga bag‘ishlangan "SOG‘LIQNI SAQLASHDA INNOVATSION TEXNOLOGIYALAR: ICHKI TIBBIYOT UCHUN YANGI IMKONIYATLAR" IV Xalqaro ilmiy-amaliy anjumani Respublikamiz sog‘liqni saqlash tizimini yanada rivojlantirishga hissa qo‘shish barobarida xalqaro tajriba almashish maydoni vazifasini ham o‘taydi desak, mubolag‘a bo‘lmaydi.
SamDTU Matbuot xizmati
