Joriy yilning 4-6-aprel kunlari Samarqand davlat tibbiyot universiteti mezbonlik qilgan 2-Yevroosiyo Tibbiyot Kongressi va 1-Yevroosiyo Hamshiralar Kongressi bo‘lib o‘tdi. Tibbiyot sohasida ilg‘or tajribalar, innovatsiyalar va texnoloigiyalarni joriy qilish hamda hamkorlikni rivojlantirish uchun muhim platforma vazifasini o‘tagan anjumanda Buyuk ajdodimiz Abu Ali ibn Sino merosini o‘rganish va uning tibbiyot faniga qo‘shgan hissalarini e’tirof etish asosiy mavzu sifatida muhokama qilindi. Shuningdek, minimal invaziv jarrohlik va robot jarrohlik: Zamonaviy texnologiyalar yordamida jarrohlik amaliyotlarini yanada takomillashtirish va bemorlar uchun xavfsizligini oshirish, Saraton kasalliklarini erta aniqlash, samarali davolash usullarini muhokama qilish va tajriba almashish, Tibbiy kadrlar tayyorlashda innovatsion usullar va simulyatsion texnologiyalardan foydalanish tajribalari muhokama qilinib, fikr almashildi.
Xalqaro ilmiy-amaliy anjumanda Respublikamiz bilan bir qatorda Rossiya, Turkiya, Germaniya, Xitoy, Qozog‘iston, Ozarbayjon, Tojikiston va bir qator qo‘shni mamlakatlardan jami 400 dan ortiq soha vakillari, tadqiqotchilar ishtirok etdi.
Kongress ochilishida so‘zga chiqqan Samarqand davlat tibbiyot universiteti rektori, professor Jasur Rizayev tashkil etilayotgan mazkur nufuzli anjumanning ilmiy va amaliy tibbiyotdagi ahamiyatini alohida ta’kidladi.
2-Yevroosiyo Tibbiyot Kongressi va 1-Yevroosiyo Hamshiralar Kongressida tibbiyotning ko‘plab dolzarb muammolariga qaratilgan chiqishlar, jumladan, “TARIX DAVOMIDA ZAMONAVIY YEVROPA TIBBIYOTINING YUTUQLARI VA YO‘QOTISHLARI”, “LAPAROSKOPIK VA ROBOTLASHTIRILGAN JARROHLIK: O‘TGAN, HOZIR VA KELAJAK”, “TORAKAL JARROHLIKDA ROBOT YORDAMIDA AMALGA OSHIRILADIGAN OPERATSIYALARNING TEXNIK XUSUSIYATLARI”, “JIGAR EXINOKOKKOZINI DAVOLASHDA LAPAROSKOPIK TEXNOLOGIYA IMKONIYATLARI”, “TO‘G‘RI ICHAKNING ROBOT JARROHLIGI” kabi bir qator mavzularda ma’ruzalar qilinib, fikr almashildi.
Shuningdek, Respublikamiz hamda xorijlik yetakchi mutaxassislar tomonidan ROBOT JARROHLIK, LAPAROSKOPIK GINEKOLOGIYA VA UROLOGIYA, INTERVENTSION RADIOLOGIYA VA USG, LAZER PROKTOLOGIYA hamda hamshiralik kurslari tashkil etilib, muhim mavzularda 25 dan ortiq mahorat darslari o‘tkazildi.
Xalqaro ilmiy-amaliy kongress doirasida SamDTU ko‘p tarmoqli klinikasi xirurgik korpusi bazasida yetakchi mutaxassislar ishtirokida 15 ga yaqin xirurgik, urologik, ginekologik jarrohlik amaliyotlari va Samarqandda ilk bora murakkab robot xirurgiyasi operatsiyalari o‘tkazildi. Shuningdek, viloyatdagi og‘ir darajadagi bemorlar uchun tibbiy ko‘riklar ham tashkil etildi.
Kongress ochilish marosimida “ECAQA” (Ta’lim va sog‘liqni saqlash sohasida akkreditatsiya va sifatni ta’minlash bo‘yicha Yevroosiyo markazi) mustaqil akkreditatsiya va reyting agentligi tomonidan Samarqand davlat tibbiyot universitetining ta’lim faoliyati sifatining jahon standartlari va mezonlariga muvofiqligini tasdiqlovchi xalqaro institutsional akkreditatsiya sertifikati topshirildi.
2030-yilga qadar amalda bo‘ladigan mazkur akkreditatsiya nafaqat universitet, balki unda o‘qiyotgan minglab talabalar uchun ham katta imkoniyatlar eshigini ochib, bitiruvchilarning diplomlari xorijiy davlatlar va ish beruvchilar tomonidan tan olinishiga zamin yaratadi.
2-Yevroosiyo Tibbiyot Kongressi va 1-Yevroosiyo Hamshiralar Kongressi Respublikamizda tibbiyot sohasini yanada rivojlantirish, bilim va tajriba almashish, innovatsiyalarni joriy etish, shuningdek, xalqaro hamkorlikni mustahkamlash, tibbiyot va hamshiralik sohalarida o‘zaro aloqalarni chuqurlashtirish va ilmiy tadqiqotlar uchun yangi imkoniyatlar yaratishi bilan nihoyatda ahamiyat kasb etdi desak, mubolag‘a bo‘lmaydi.
