Mamlakatimiz milliy siyosatining eng muhim, ustuvor yoʻnalishlaridan biri barcha millatlarning ravnaqi uchun teng sharoit va imkoniyat yaratish, millatlararo munosabatlarni uygʻunlashtirishdir. Bu tamoyil qomusimiz orqali ham mustahkamlab qoʻyilgan. Mazkur vazifalarni amalga oshirish maqsadida Millatlararo munosabatlar va xorijiy mamlakatlar bilan doʻstlik aloqalari qoʻmitasi tashabbusi bilan “Xalqaro bagʻrikenglik kuni”ga bagʻishlab mamlakatimizda “Bagʻrikenglik haftaligi” oʻtkazilmoqda.

  Samarqand davlat tibbiyot universitetida bugungi kunda koʻplab xorijiy talabalar taʼlim olib kelmoqdalar. Joriy yilning 3-noyabr kuni “Xalqaro taʼlim” fakulteti talaba-yoshlari bilan “Bagʻrikenglik haftaligi” doirasida doʻstona bayram tadbiri tashkil etildi. Mazkur tadbirda SamDTU Xalqaro hamkorlik boʻyicha prorektori Aminov Zafar Zoirovich, Xalqaro taʼlim fakulteti dekani Mamarajabov Sobirjon Ergashovich, Md House kompaniyasi rahbari Sunil Sharma hamda hindistonlik talabalar ishtirok etishdi.

  Tadbirda ikki mamlakat hamda millat oʻrtasidagi mustahkam doʻstlik aloqalari nafaqat taʼlim, balki boshqa sohalarda ham taraqqiy etib borayotgani taʼkidlandi. Shuningdek, SamDTU hindistonlik talabalarining milliy chiqishlari yigʻilganlarga yuqori kayfiyat ulashdi.

SamDTU matbuot xizmati