2022-yil 18-mart kuni Samarqand davlat tibbiyot institutida “Otorinolaringologiyada diagnostika va davolashning zamonaviy texnologiyalari” mavzusida Xalqaro ilmiy-amaliy konferensiya boʻlib oʻtdi. Xalqaro ilmiy forumda Italiya, Ozarbayjon, Rossiya, Belarus, Qozogʻiston, Tojikiston va Oʻzbekistonning yetakchi tibbiyot oliy oʻquv yurtlarining 300 dan ortiq vakillari ishtirok etdilar.

  Xalqaro anjumanning tantanali ochilishida SamDTI rektori prof. J.A. Rizayev, Qozogʻistonda xizmat koʻrsatgan fan arbobi, akademik R.K. Tulebaev, Siena Universitetining otorinolaringologiyaga ixtisoslashuv maktabi direktori, Italiya Rinologlar assotsiatsiyasining faxriy aʼzosi prof. Desiderio Passali, Rossiya Federatsiyasi Federal Tibbiyot-biologiya agentligi Otorinolaringologiya milliy tibbiy tadqiqot markazi direktorining xalqaro faoliyat boʻyicha oʻrinbosari prof. Diab Hassan Mohamad Ali, Rossiya davlat ijtimoiy universiteti rektori v.b., Rossiya Badiiy akademiyasi akademigi prof. A.L. Xazin, Toshkent pediatriya tibbiyot instituti otorinolaringologiya va stomatologiya kafedrasi mudiri prof. Sh.E.Amonov konferensiya ishtirokchilariga oʻzlarining qutlov soʻzlarini yoʻlladilar.

  Anjumanning yalpi majlisida otorinolaringologiyada diagnostika va davolash sohasidagi soʻnggi yutuqlarga oid maʼruzalar tinglandi. Soʻngra, xalqaro forum ishi shoʻba yigʻilishlarida davom etdi.

  Konferensiya ishida quloq va vestibulyar apparatlar patologiyalarini diagnostika qilish va davolashning zamonaviy usullari, burun va paranazal sinuslar patologiyalari, halqum kasalliklari tashxislar va davolash istiqbollari, shuningdek yosh tadqiqotchilar-otolaringologlarning yutuqlari keng muhokama qilindi.

  Samarqand davlat tibbiyot institutida oʻtkazilgan “Otorinolaringologiyada diagnostika va davolashning zamonaviy texnologiyalari” Xalqaro ilmiy-amaliy konferensiyasi amaliy tibbiyot yoʻnalishlarida kadrlar tayyorlash sifatini oshirish, yosh olimlarni ilmiy-tadqiqot faoliyatga keng jalb etish hamda respublika universitetlarini dunyoning yetakchi tibbiyot universitetlari va ilmiy markazlari bilan aloqalarini mustahkamlashga xizmat qiladi.

SamDTI matbuot xizmati